Posted at 06:23 PM
Nilagyan mo ng tuldok
itong dulo ng bugtong
At bigla kang nagtanong
San nga ba ang karugtong?
Ng iukit mo ang larawan
Lubhang malalim ang katam.
Napilas ang dahon
At nanguluntoy ang pagkakataon.
Hinaplos mo ang buhangin
At pinagsugpong ang hangin.
Tinanaw mo ang nakaraan
At nasumpungan ang kinamulatan.
Biglang lumagaslas ang dalampasigan
Iniluwa ang tinik ng karagatan.
Tumalikod ka ng walang paalam
Kasabay ng pagbagsak ng ulan.
Bumulong ka sa dibdib ng pag-asa,
Saan ka nga ba magsisimula?
Comment
